10 Vamakwezru, ni djula mi swi tiva leswaku vakokwana vezru hinkwavu va fambe hansi ka tlavi nakone hinkwavu va tsremakanye lwandle, 2hinkwavu va babatisiwe swanga valandzreli va Moxe na va li mahlweni ka tlavi loko va tsremakanya lwandle, 3hinkwavu va de swakuda leswi fanaka leswi pfaka ka Xikwembu Nkulukumba* 4nakone hinkwavu va nwe mati lama pfaka ka Xikwembu Nkulukumba. Hikusa hinkwavu a va nwa mati lawa a ma pfa ka zribye ledzri Xikwembu Nkulukumba a a va nyike dzrone ledzri a dzri famba na vone, a zribye dzroledzro a dzri yimela Kriste.* 5Nambitanu, ntalu wavu Xikwembu Nkulukumba a nga va nyonxelanga, xileswo a va dlayile a mananga.
6Kutani leswi swi va yentxekeliki swi basopisa hine, akuva hi nga naveli mintxhumu ya ku biha hi lani vone va yentxiki ha kone. 7A hi fanelanga hi gandzrela swithombe hi lani van’we vavu va yentxiki ha kone. Hi lani Matsralwa ma hlayaka ha kone ma ku: “A vhanu va tsrhame hansi va da, va nwa, va gama va sekeleka va nyonxa.” 8Hi nga yentxeni swa tingana hi tlhelo dzra tinkuku,* hi lani van’we vavu va yentxiki ha kone, kutani ku fa 23.000 wa vone hi siku dzrin’we. 9Hi nga dzringeni Yehovha, hi lani van’we vavu va mu dzringiki ha kone, kutani va dlayiwa hi tinyoka. 10Nakone hi nga ngurangureni, hi lani van’we vavu va yentxiki ha kone, kutani va dlayiwa hi ntsrumi. 11A mintxhumu leyi yi va yentxekeliki ya hi dondzrisa, nakone yi tsraleliwe ku basopisa hine hi hanyaka a masikwini ya wugamu.
12Kutani lweyi a yanakanyaka leswaku a yimile, a a tivoneli akuva a nga wi. 13A mi si na kumana ni ndzringo wa ku hambana ni lowu van’wana va kumanaka na wone. Kambe Xikwembu Nkulukumba awa dumbeka nakone a nge ti mi tsrhika mi dzringiwa hi ndzringo lowu mi taka hluleka ku wu tiyiselela, kambe loko mi dzringiwa a ta mi pfulela ndlela akuva mi kota ku wu tiyiselela.
14Xileswo vazrandzriwa, mi nga txhuki mi* gandzrela swithombe.* 15N’wine mi vhanu lava nga ni ku twisisa; xileswo swi kambelani ha wuswenu leswaku leswi ni swi hlayaka i swinene kumbe a hi swinene. 16Loko hi nwa kopo dzra matovoko ledzri hi dzri khongotelaka,* xana a ho hlengela ngatini ya Kriste? Loko hi da pawu ledzri hi dzri khemaka, xana a ho hlengela mizrini wa Kriste? 17A pawu i dzrin’we, xileswo nambileswi hi nga vanyingi, hi mizri wun’we, hikusa hinkwezru hi da pawu dzroledzri dzra dzrin’we.
18Pimisani hi leswi Vaisrayele* va swi yentxaka: Loko va da magandzrelo xana a vo hlengela ka ku gandzrela Xikwembu Nkulukumba a altarini? 19Kutani ni djula ku hlaya swa ku yini hi leswo? Xana ni djula ku hlaya swaku a magandzrelo lama hambeliwaka xithombe i ya lisima, kumbe a xithombe i xa lisima? 20Im-him, a ni hlayi swone; kambe ni hlaya leswaku a magandzrelo lawa vamatiko va ma hambaka va ma hambela mademona, a va ma hambeli Xikwembu Nkulukumba; kutani mine a ni swi djuli kuva mi hlengela ni mademona. 21A mi nge swi koti ku nwa kopo dzra Yehovha ni kopo dzra mademona; a mi nge swi koti ku da ka menza wa Yehovha ni ka menza wa mademona. 22Kumbe ‘ho zama ku yentxa leswaku Yehovha a va ni wukwele’? Xana ho va ni ntamu ku mu tlula?
23A mintxhumu hinkwayu ya pfumeleleka kambe a hi mintxhumu hinkwayu yi pfunaka. A mintxhumu hinkwayu ya pfumeleleka kambe a hi mintxhumu hinkwayu yi yakaka. 24Mun’wana ni mun’wana a a yentxi leswi taka pfuna van’wana, ku nga li leswi taka pfuna yene ntsena.
25Danani nyama yin’wana ni yin’wana leyi xavisiwaka bazara, mi nga vutisi ntxhumu hi mhaka ya lipfalu dzrenu, 26hikusa “a misava ni hinkwaswu leswi nga ka yone i swa Yehovha”. 27Loko mhunu lweyi a kalaka a nga li mupfumeli a mi zramba leswaku mi ya da swakuda, nakone mi nyonxela ku famba, danani hinkwaswu leswi mi taka phameliwa swone, mi nga vutisi ntxhumu hi mhaka ya lipfalu dzrenu. 28Kambe loko mhunu wa kukazri a mi byela a ku: “A nyama leyi yi phahleliwe xithombe”, mi nga di akuva ku nga vi na lweyi a taka kazratiwa hi lipfalu. 29A ni hlayi lipfalu dzrenu, kambe ni hlaya lipfalu dzra mhunu mun’wana. Hikusa hi mhaka muni a ntsrhunxeko lowu ni nga na wone wu fanela ku yavanyisiwa hi lipfalu dzra mhunu mumbeni? 30Nambiloko ni khongota ni tlangela loko ni da, ha yini ni fanela ku swi yentxa loko leswo swi ta yentxa van’wana va ni yavanyisa?
31Xileswo, nambiloko mi da kumbe mi nwa kumbe mi yentxa ntxhumu wun’wana ni wun’wana, yentxani hinkwaswu akuva ku dzrumisiwa Xikwembu Nkulukumba. 32Tivonelani akuva mi nga khunguvanyisi Vayuda, Vagriki ni bandla dzra Xikwembu Nkulukumba, 33ku fana na mine ni zamaka ku nyonxisa vhanu hinkwavu ka mintxhumu hinkwayu, a ni tidjuleli leswi taka pfuna mine ntsena, kambe leswi taka pfuna vhanu vanyingi akuva va ta kota ku huluxiwa.
